Tutti i testi del cd "Hjuri di hjumari
PASSA LU MARI
Oilì Oilà, si mi vo' beni
passa lu mari e venimi a cercari
venimi a cercari pe' mari e pe' terra,
duvi la genti non passanu mai...
Sugnu partitu 'nta la notti scura
n'anedu d'oru 'nta mari jettai
ohi mala sorti, desertu di ventu
'nta lu me cori paura e turmentu
vaju a trovari 'na terra luntana
ma 'nta lu cori mi portu a vui
a vui chi siti a luci 'i chisti occhji
chi notti e jornu vidinu a vui...
Oilì Oilà, si mi vo' beni
passa lu mari e venimi a cercari
venimi a cercari pe' mari e pe' terra,
duvi la genti non passanu mai...
Sugnu sbarcatu tra Riace e Caulonia
terra del sud, della lira che sona
'na tarantella a Piazza Mesi,
cu' Santu Lariu nu palestinesi
cu' l'iracheni e nigeriani,
allu Spiruni 'ndi stringimu li mani
nesci lu suli e ancora ballamu,
scind'u suli e no 'ndi stancamu
a tarantella e no 'ndi stancamu
Oilì Oilà, si mi vo' beni
passa lu mari e venimi a cercari
venimi a cercari pe' mari e pe' terra,
duvi la genti non passanu mai...
HJIURI DI HJIUMARI
Senti profumu di janestra
Quandu lapri ssa finestra,
Trasi lu suli ‘nta li casi,
Senti profumu di pajisi.
Terra chi tremi e fai fujiri,
Terra chi sempri dai suspiri,
Terra d’amuri mari e suli,
Terra di praja e di caluri.
Aloari, spini e spalasari,
Cafuni e timpi, hjiuri di hjiumari.
Vuci chi chjiama: “Venitindi amuri!
Ca sugnu sula chi zappu ‘nta si chjiani.”
Scrusci l’agghjiru ‘nta la frasca,
Mangia li mura di ruvetta.
Luci la luna e staci cittu,
Senti ‘na botta di scupetta.
Lucinu l’occhji ‘nta lu scuru,
Botta di lampu ‘nta lu cielu.
Scorci lu porcu ‘nta la zimba,
Mangi ricotta e ‘mbivi seru.
“E arzira fici liti
cu nu vecchjiu panararu.
Mi volìa na lira e menza
di ‘na cofana e nu panaru,
E non era fattu bonu,
era tuttu sculacchjiatu.
O Madonna di lu Ritu,
fa mu veni la hjiumara
Mu si leva lu cannitu,
nommu fannu chjiù panara.”
Aloari, spini e spalasari,
Cafuni e timpi, hjiuri di hjiumari.
Vuci chi chjiama: “Venitindi amuri!
Ca sugnu sula chi zappu ‘nta si chjiani.”
LAROGGIU D’AMURI
Vorria mu sacciu si si po’ passari
Senza traghettu di riggiu a messina
Vorria mu sacciu si si po’ mangiari
Frundi di cucuzza e gelatina
Vorria mu sacciu si si po’ murari
Senza la petra la carci e la rina
Vorria mu sacciu si si poti amari
Amari senza amuri e senza stima
Si laroggiu d’amuri e sempri batti
Supa lu pettu meu mini li botti
La lima cu lu ferru si cumbatti
Poti la lima ch'è d’azzaru forti
Virdi u leandru e belli avi li hjiuri
Però porta amarizzi singolari
Lu virdi è signu di spiranza e amuri
Li hjiuri su li toi bellizzi rari
Si laroggiu d’amuri e sempri batti
Supa lu pettu meu mini li botti
La lima cu lu ferru si cumbatti
Poti la lima ch'è d’azzaru forti
E balla finu a quandu non nesci u suli
Ca tutta a notti ti vogghju guardari
Si laroggiu d’amuri e sempri batti
Supa lu pettu meu mini li botti
La lima cu lu ferru si cumbatti
Poti la lima ch'è d’azzaru forti
PARRAMI DI LU SULI
Ventu chi vai pe lu mari cantami na canzuna
Parrami di lu suli e di la luna
Sciogghjimi sa catina chi mi stringi lu pedi
Dammi nu paru d’ali, vogghju volari
E veni e va l’amuri va
Comu lu jornu e la notti va
Comu lu ventu di tramuntana
Comu acqua frisca di la funtana
Comu l’accedu chi va pe mari
Comu lu cantu di la sirena
Comu la rosa chi mi dunasti
Comu l’amuri chi mi giurasti
Occhji di calamita lu cori ‘ncatinasti
Labbra di focu ardenti tu mi parrasti
Ventu chi vai pe lu mari cantami na canzuna
Parrami di lu suli e di la luna
E veni e va l’amuri va
Comu lu jornu e la notti va
Comu lu ventu di tramuntana
Comu acqua frisca di la funtana
Comu l’accedu chi va pe mari
Comu lu cantu di la sirena
Comu la rosa chi mi dunasti
Comu l’amuri chi mi giurasti
SANTU ROCCU
Nesciu na stida ‘nto cielu stasira
Esti la stessa di mill’anni fa
Luccica luccica a luna ‘nto mari
Luccica u cielu i tutti li spari
E l’ultima sira affacciata ‘o barcuni
Ti cantu e ti sono e ti vogghjiu cu mmia
E l’urtima sira chi ti pozzu guardari
Chjiù bella d’u suli e non ti pozzu toccari
Ma si mi voi fujitilla cu mia (3 volte)
Abballamu abballamu scarzi ‘nta sa chjiazza
E sonamu e sonamu sti centu tamburi
E cantamu e cantamu a Santu Roccu chi passa
E pregamu lu signuri mu ‘ndi faci la grazia
Mu ‘ndi libera sta terra mu ‘ndi lapri li vrazza
Mu sana lu mali ne mu caccia velenu
Mu ‘ndi manda la paci mu ‘ndi duna lavuru
Mu ‘ndi linchi lu cori chinu d’amuri
Mu ‘ndi batti lu cori chinu d’amuri
E pistanu pistanu li sonaturi
E abbattinu li mani a li criaturi
Chi abbasanu lu santu di chist’urtima festa
Finiu l’estati e finiu la festa
C’abbasanu lu santu di chist’urtima festa
Finiu l’estati e finiu la festa
Ma si mi voi fujitilla cu mia (3 volte)
Abballamu abballamu scarzi ‘nta sa chjiazza
E sonamu e sonamu sti centu tamburi
E cantamu e cantamu a Santu Roccu chi passa
E pregamu lu signuri mu ‘ndi faci la grazia
Mu ‘ndi libera sta terra mu ‘ndi lapri li vrazza
Mu sana lu mali ne mu caccia velenu
Mu ‘ndi manda la paci mu ‘ndi duna lavuru
Mu ‘ndi linchi lu cori chinu d’amuri
Mu ‘ndi batti lu cori chinu d’amuri
Abballamu abballamu scarzi ‘nta sa chjiazza
E sonamu e sonamu sti centu tamburi
Abballamu abballamu scarzi ‘nta sa chjiazza
E sutta su cielu facimu l’amuri
Abballamu abballamu scarzi ‘nta sa chjiazza
E sonamu e sonamu sti centu tamburi
Abballamu abballamu scarzi ‘nta sa chjiazza
E sutta su cielu facimu l’amuri
NINNA NANNA
Siti dui boccioli di vita
Chi fujinu casa casa
Siti dui stidi calati
Calati di lu paradisu
Mmm mmm mmm…
Ninna nanna oooh
Ninna nanna
Ventu di vita e d’amuri
Gioia di chistu cori
Hjiuri di primavera
terra di suli e mari
Mmm mmm mmm…
Ninna nanna oooh
Ninna nanna
Hjiuri lu meu giardinu
dui hjiuri profumati
hjiuri di milli culuri
sonu di ciarameda
Dormiti ‘nta sa terra
di spini e di sangu
dormiti ‘nta su mari
di sbarchi, doluri e sali
Mmm mmm mmm…
Ninna nanna oooh
Ninna nanna
Dormi figghju meu
Dormi figghja mia
Ca siti di lu cielu
Dui angiali calati
Mmm mmm mmm…
Ninna nanna oooh
Ninna nanna
U SALUTU
Saluti bona genti simu amici
Lu suli faci festa stamatina
Trema lu scogghjiu e arrumba la hjiumara
E tutta la natura si ricrija
Lu mari cu li stidi e la virdura
Vannu gridandu la campana sona
L’amici su sbarcati alla marina
Mo fannu puru festa a lu pajisi
Nui simu ‘nta la terra di li hjiuri
La mamma di l’arangi e di la lira
Duv’è superbu ancora lu castedu
‘ndi jetta na frischjiata e ‘ndi cunzula
Hjiuriti quandu hjiuri a primavera
cu servi, cu garzuni e povaredi
amici stritti chjini di paura
quandu la notti jornu si facia
e mo chi vaji lisciu e tuttu chjianu
vogghjiu pemmu v’a dugnu a bona nova
auguri e santa paci mu passati
li festi ‘ncatojiati cu ll’amici
Nui simu ‘nta la terra di li hjiuri
La mamma di l’arangi e di la lira
Duv’è superbu ancora lu castedu
‘ndi jetta na frischjiata e ‘ndi cunzula
Ma mo chi simu tutti ‘nta sa chjiazza
Nu brindisi facimu puru a chidi
Chi vinnaru cu vertuli e furcuni
Mu scuvanu li lupi ‘nta na tana
Focu mu pigghja a tutti li patruni
Chi vozzaru li servi ‘ncatinari
E ‘mparadisu ‘nveci li garzuni
Chi senza pani ‘ndepparu a campari
VURRIA
Vorria mu su n’arcejiu i paradisu
N’aquila d’oru chi ti porta’ncielu
Cu ll’occhji dintra s’occhji di surrisu
Arrivutata ‘nta nu jancu velu
Suli mu sugnu e mu ti fazzu strata
Aquila chi t’accurcia li camini
Vorria mu su na rosa profumata
Na rosa di villutu senza spini
Ciangi la vita mia comu sta corda strana
Veni anima mia t’aspettu a la funtana
Veni chjianu chjianu, parrami vicinu
Stasira l’arceji cantanu ‘nta su giardinu
Vorria mu sugnu l’unda di lu mari
Lu raggiu di lu suli e di la stija
Quantu eu mu ti pozzu carizzari
Sa facci di palumbu picciriju
Suli mu sugnu e mari e cielu e terra
Tuttu mu sugnu pe a bellizza tua
La fata di lu munti e di la serra
Mi ciangiu li to peni in cuntentizza
Ciangi la vita mia comu sta corda strana
Veni anima mia t’aspettu a la funtana
Veni chjianu chjianu, parrami vicinu
Stasira l’arceji cantanu ‘nta su giardinu
U MASSARU
Se voi mangiari pane de maise
Pigghjate nu massaru ohi donna bella
Nun ti prejari du carzuni tisu
Chi ti porta lu pani in tuvagliella
De mille amanti tu tenive pisca
E ti pigghjiasti nu bruttu craparu
Lu mari, lu mari, lu mari è fundu
L’amuri mia a tia ti dugnu
La luna, la luna esti lucenti
L’amuri mia a tia pe sempri
Lu suli, lu suli esti cocenti
Se ombiju a tia ombiju nenti
T’innamurasti da ricotta frisca
Va vidi a lu granaru si c’è ranu
Parti lu marinaru e va pe mari
Dassa menza cinchina alla mugghjieri
Mugghjieri mia accattancindi pani
‘nzicchè ‘nci vaju e vegnu di missina
Lu mari, lu mari, lu mari è fundu
L’amuri mia a tia ti dugnu
La luna, la luna esti lucenti
L’amuri mia a tia pe sempri
Lu suli, lu suli esti cocenti
Se ombiju a tia ombiju nenti
Santu Nicola miu fallu annigari
Ca non mi curu ca restu cattiva
Ca quantu vali n’anca di massaru
Non vali na barca cu triccentu rimi
Lu mari, lu mari, lu mari è fundu
L’amuri mia a tia ti dugnu
La luna, la luna esti lucenti
L’amuri mia a tia pe sempri
Lu suli, lu suli esti cocenti
Se ombiju a tia ombiju nenti
OCCHJI DI MARI
Perla d’argentu e occhji di mari
Di la calabria tu si la reggina
La notti ‘nta lu sonnu mi cumpari
Cuntentu mi risbigghju ogni matina
Guardandu eu li stiddi i sta nuttata
Li chjiù lucenti li vorria cuntari
Tu si comu na rosa profumata
E chjiù ti guartdu e chjiù bella mi pari
Quantu frundi ‘ndavi sa livara tanti bellizzi ‘ndavi sa figghjola
Quantu frundi ‘ndavi sa livara tanti bellizzi ‘ndavi sa figghjola
La guardava chi ricama e cusi sutta all’arburu di nuci
La guardava chi ricama e cusi sutta all’arburu di nuci
Sutta ll’arburu di nuci la bella mia ricama e cusi
Sutta ll’arburu di nuci la bella mia ricama e cusi
Su ‘namuratu di na bella figghjola
Bella cotrara di la scalinata
Quandu ti guardu lu suli si scura
Lu jornu notti faci diventari
Guardandu eu li stilli i sta nuttata
Li chjiù lucenti li vorria cuntari
Tu si comu na rosa profumata
E chjiù ti guardu e chjiù bella mi pari
Quantu frundi ‘ndavi sa livara tanti bellizzi ‘ndavi sa figghjola
Quantu frundi ‘ndavi sa livara tanti bellizzi ‘ndavi sa figghjola
La guardava chi ricama e cusi sutta all’arburu di nuci
La guardava chi ricama e cusi sutta all’arburu di nuci
Sutta ll’arburu di nuci la bella mia ricama e cusi
Sutta ll’arburu di nuci la bella mia ricama e cusi (x2)
CITULA D’ARGENTU
Chitarra d’oru e citula d’argentu
Fati sentiri stu sonu ‘mperiali
Canzuni aju a cantari chjiù di centu
Mu schiatta cu non voli e parra mali
Eu su comu lu lupu a passu lentu
E non mi spagnu si bajiunu i cani
Li cosi fazzu a tempu e mai mi pentu
Senza livatu non si faci pani
La luna è janca e vui brunetta siti
Ija è d’argentu e vui l’oru portati
Ija si scura e vui ca la vinciti
Ija s’accrissa e vui non v’accrissati
Vui lu suli e la luna ca vi uniti
Ma ne suli e no luna vi chjiamati
Si lu suspiru avissi la parola
Chi bellu ‘mbasciaturi chi sarria
Parti suspiru cu lu ventu vola
Vai a trovari tu la bella mia
Eu t’amu quantu poti n’omu amari
Ti vogghjiu beni chjiù chi ti volia
La luna è janca e vui brunetta siti
Ija è d’argentu e vui l’oru portati
Ija si scura e vui ca la vinciti
Ija s’accrissa e vui non v’accrissati
Vui lu suli e la luna ca vi uniti
Ma ne suli e no luna vi chjiamati…
…“La luna ammanca e vui sempri crisciti,
ija perdi la luci e vui la dati…
e si ll’arrivi penzerusa e sula
dinci ca chistu cori la desia”…
La luna è janca e vui brunetta siti
Ija è d’argentu e vui l’oru portati
Ija si scura e vui ca la vinciti
Ija s’accrissa e vui non v’accrissati
Vui lu suli e la luna ca vi uniti
Ma ne suli e no luna vi chjiamati (x2)
CUGNU DI TRONA
Eu mi criscìa cu pani e cipuda,
zappandu rasuledi e runcatini.
Quandu la notti a lu mulinu jia,
spettandu l'ora di lu macinari,
venia la bella mia cu la codata 'n testa,
volìa mu nci li sciogghju chidi trizza,
ballava a tarntella dintr'all'aria,
a sonu di zampogna e tamburinu.
Vinni lu tempu di la mala ura,
non c'è cchjù sonu di lu zampugnaru,
venni lu tempu di li me' penzera,
parzi ca fu lu cugnu di li trona.
Li carzi su' di filu e di janestra
e lu corpettu di arbasu finu.
Eu nda passavi notti senza sonnu,
a la muntagna, sulu cu' li stidi,
mbivìa sulu si siti ndavìa
'nta cafunnedi asciutti e mali strati,
i megghju amici i megghju curtedati:
arrasu 'i tutti, arrasu e malu sia!
Vinni lu tempu di la mala ura,
non c'è cchjù sonu di lu zampugnaru,
venni lu tempu di li me' penzera,
parzi ca fu lu cugnu di li trona.
PIZZICARELLA
Arrivau la notizia stamatina
chi Cicciu sa fujiu cu' Rosina;
fici l'amuri cu tutta la Chjana,
puru cu mmia finu a stamatina.
E com'a lu mari forti fai schjumazza,
conzala comu voi sempi è cucuzza.
E 'nchjanai sup'a pumara
e scindìa ch'i mani chini,
e mugghjerima nesci paccia
pe' nu paru di ricchjini.
Na e via, na e via,
tutta Napuli cerca a mia,
si ruppiu la ricriata
e nci restau la gelusia.
Ca pari n'ovu cuvatu quandu sguazza,
prestu si ruppi aundi attruzza attruzza.
O fimmini non jiti cchjù pe' ligna,
nommu v'imbattarria Petru Castagna!
Si 'ndavi mu vi vidi 'nta la vigna
ca vi lu duna lu scotul'agghjanda.
E com'a lu mari forti fai schjumazza,
conzala comu voi sempi è cucuzza.
Vorria mu mi 'ndi vaju a funtanella,
aundi nci sunnu i belli pe' spusari,
pemmu la scegliu eu la cchjù bella,
pecchì mi vogghju, bella, maritari.
Ca pari n'ovu cuvatu quandu sguazza,
prestu si ruppi aundi attruzza attruzza.
E com'a lu mari forti fai schjumazza,
conzala comu voi sempi è cucuzza.
E ndra e ndra e ndra,
lu monacu fuji e la monaca è gghjà!
Nessun commento:
Posta un commento